ti di pannacaquita iti libnos
ti rupa ti Apo tayo á Dios:
rigat unay daytoy á nacaro
á cas met la iti infierno.
_Icacaasitay ala, cristiano ..._

¡Oh ama, n~ga nagpútot
itoy anac mo á pinatáod!
¿dica man aya magutogot
á mangban~gár cadaguitoy tooc?
ita unay ti pannacasapol co
cadaguiti ayat quen dungn~go.
_Icacaasitay ala, cristiano ..._

¡Oh ina! n~ga nanapsappuyot
itoy bun~gam sipod idi sicog,
ipaaymo coma ala ita n~garod
daydi ayat mo á nasilnog:
ina, urayec ita sungdo
ti tulong mo itoy rigat co.
_Icacaasitay ala, cristiano ..._

Sicá met n~ga inanac,
á iti dungn~go naguibosac
itan ta adda ac itoy rigat
¿inca n~gata caniacon malipat?
no bayan nac, sica ti pudno
á caulpitan daguiti tattao,
_Icacaasitay ala, cristiano ..._

Anac co, laglaguipem comá
daydi nasalucag á regtá
á panan~gayayoan co quenca
sipod pay idi maladaga ca:
¿lipat quen panáguindidiammo
ti pagsupapac mo aya, anac co?
_Icacaasitay ala, cristiano ..._

No taguilipat ti aramidem
quet bayan nac á sireremrem
itoy tooc á nadaguinsen
mariroca unay quet patiem
ta nasquen n~ga annong mo
á icacaasina cam á dacquel mo.
_Icacaasitay ala, cristianos ..._

Dacay met á nasalucag
á dumidinna idi caniac
diyo n~gata maal-lin~gag
¿daguitoy asasog á naoadoad?
¡ay! ala coma cadi itdenyo
ti dacquel á itulongyo.
_Icacaasitay ala, cristianos ..._

¡Oh nadn~gó á pagayam!
in ca met unay aoagan
ta daydi ayat á capatgan
dica pay met la coma bayán:
iti rigat iso ti napaypayso
a pacapnecan ayat á pudno.
_Icacaasitay ala, cristiano ..._

Panangpacaoan iti ranggas,
_misa_ quen aramid á naimbag
nabileg da amin á man~goasoas
cadaguitoy caoar á nangpatapat,
anansata coma ala ida ipaayyo
tapno mabaoásan tooc mi á nacaro.
_Icacaasitay ala, cristiano ..._

Ni San Miguel á principe
ipatalguedna unay cadacami
n~ga guináoa ti lacámenmi
cas maitimbeng iti caasi
daguiti naayat á tattao
á puspuso da ti nasungdo.
_Icacaasitay ala, cristiano ..._

Iti magnipaay tulong na
cadaguitoy rigat á masagaba
agsubsubalitcamto quencuana
sibibiag pay quen inton patay na:
pannacaocom nanto ti di nacaro
ta idadaoatminto iti Dios Apo.
_Icacaasitay ala, cristiano ..._

Yata ammoyo amin unay
n~ga aoan asinonto á macagaoay
iti di malisian á bileg ni patay,
asi ta puso yo cad ti matignay:
no addanto pacaban~gáran yo,
di duaduaen, yamanenyonto.
_Icacaasitay ala, cristiano_

¡Ay! cristianos, imden~ganyo
daguitoy arararao mi cadacayo.
_Icacaasitay ala, cristianos
cadaguiti adda sadi Purgatorio_.

_Requiescant in pace_. Amen



CARARAG ITI SAGRADA FAMILIA.

¡Oh Jesús, naayat unay á nan~gisalacan cadacami! n~ga idinto ta
bimmabáca sadi lan~git á umay mánglaoag itoy lubong iti panan~gisurom
quen panagpatulad mo, quinayatmo ti adadda n~ga nagtaéng iti panagbiag
mo idi nanumo n~ga balay sadi Nazaret, situtulnog quen siannugot cada
María Santísima quen San José, quet casta unay ti panangpadaeg mo iti
daydi á balay tapno isó ti pagolidanan amin daguiti cristianos: aoatem
coma á sicacaasi toy guimong mi á maidaton amin ita Quenca. Saluadem,
saranayem coma, Apo, quet pasingquedam met coma quencuana ti nasantoan
á panagbuteng Quenca casta met ti talna quen timpuyog ti nadalos á
panagayanayat daguiti cristianos tapno agbalin á umasping iti na
Diosan á olidan á iso ti Guimong yo; quet dacam amin maragpatmi met
coma ti agnanayon á gasat.

¡Oh naayat unay á María, Ina ni Jesucristo quen Ina mi met! maipoon
ita ayat quen caasim, aramidem coma n~ga ni Jesús ipaayna n~ga aoaten
toy panagdaton mi quet iannugot na met coma daguiti parabor quen
pammagasat na.

¡Oh José! nasantoan á saluad idi da Jesús quen María ita nabileg á
panan~gibabaet mo tulon~ganna cam coma, apo, cadaguiti amin á
pacaducotan daguiti cararua quen baguí mí, tapno iti pannacaibuyog mi
cadacay quen María Santísima, iso á pan~gilabasam coma cadaguiti
ununnoy mi á idatagmo quen Jesús, mabalinminto ti agnanayon unay
agdaydayao quen agyaman dita Gloria. Sapay coma ta casta.

Jesús, María quen José, silaoan, sa ranayen quen ispalenda cami. Amén.



CARARAG QUEN GLORIOSO SAN ROQUE.

Oh San Roque, á catalecmi,
idaodaoatanna cam ala cadi
iti Dios Apo á Manangn~gaasi
yata inda ca amin pinili.

A taclinan pan~giasuganmi
cadaguiti umapay á paguel mi
quet incamto la, Apo, mailisi
iti pagdacsan ti cararua quen bagui.

=¡¡Sapay coma!!=


[Napirmaan] Justo Claudio Fojas
Presbitero.